[ADIERAZPENA] Melilla, Kanariar Uharteak edo Bidasoa, #HarreraHerria.

Argi erakutsi dute: pertsona batzuen bizitzek ez dute deus balio. Eta hiltzen utzi ditzakete lasai asko. Edo heriotzara bultzatu. Ez baitira gizakiak.

Duintasuna kendu, eta gizatasuna ukatu diezue. Horrela, hiltzen badira, hiltzera bultzatzen badituzue, uretan erreskatea ukatu, bizi ezinezko esparruetan atxilotzen badituzue, ez da hainbesterako izango.

Gure seguritatearen mesedetan da, diozue, eta gogoratu, ez dute gizatasunik, bizitza horiek ez dute balio.

Ba entzun ondo, bertan, gertu edo urrun zaudeten eta erabakiak hartzen ari zareten politikari eta erakundeetako ordezkariak. Zuen lana da bizitzak zaintzea. Eta bizitza guztiek dute balio berdina, ez zuek merkatuan ematen diezuena.

Giza eskubideak, oinarrizko eskubideak guztiontzako dira, ez zuek erabakitzen duzuenentzako.
Milaka bizitza akabatzen ari zarete.

Migratzea hiltzea dela sinestarazi nahi diguzue. Eta gezurra da. Migrazioa aukera, hautua edo bizitza salbatzeko modu bakarra izan daiteke. Beste guztia, sarraskia, giza eskubideen urraketa, ezer utzi ez zaionaren kontrako gehiegikeriak dira.